لسلام عليكم.. أنا ماعنديش مشكلة كبيرة أوي بس حبيت أوي أفضفض معاكم في شوية حاجات مضايقاني إلى حد ما.
أولهم خطيبي.. أنا مخطوبة من حوالي خمسة أشهر، أنا كنت أعرف عنه حاجات بسيطة جدا قبل الخطوبة، ولما اتقدم لي كان مسافر، بس أهله هما اللي جم وطلبوني، وأنا اتكلمت معاه مرة واحدة على النت قبل ما نقرأ الفاتحة، وتقبلته جدااا، طبعا ده مش كافي؛ بس بعدها بفترة صغيرة جدا نزل، وفضل معايا حوالي أسبوع، وسافر تاني، بس إحنا بنتكلم كتير على النت، واتعلقت بيه جدااا، وهو كمان كتير بيعبر لي عن حبه.
اللى تاعبني إنه بدأ ينتقدني كتير جدا، وفي نفس اللحظة اللي بيعبر لي فيها عن حبه، وأنا باتضايق جدا من الموضوع ده، وحاولت ألفت نظره وهو برضه ما زال بينتقدني كتير، ولما أعمل حاجة بيحبها وتبسطه مايقولش، إلا لما أزهق وأقول له: "إيه رأيك في اللي أنا عملته"، يقول لي: "حلو جدا"، يعني الانتقاد أول بأول إنما الشكر لا.
ولما أغيّر اللي بيضايقه ألاقيه اتضايق برضه؛ يعني مثلا قال لي: "أنتي بترني كتير"، ولو رنيت قليل؛ تاني يوم ألاقيه يتصل يقول لي: "شكرا، ولا بتعبريني"!! مش عارفة أعمل إيه؟ أنا عايزاه يبطل يتنقدني أو يقبل تصليحي، بس بجد من كتر انتقاده ليّ بدأت أشوف نفسي وحشة جدا، وشخصيتي وحشة؛ بالرغم من أن كل اللي يعرفوني دايما يشكروا فيّ جدا.
كمان لما آجي أكلمه على النت في وسط الكلام اتفاجأ إنه بيقول لي: "إيه الأسلوب ده مش حلو"، وأنا باكون باتكلم عادي جدا، وكذا مرة أقول أكيد اتكلمت وحش فأعتذر، بعدين لقيت الموضوع ده كتر، فقلت له في مرة: "أنا ماتكلمتش وحش على فكرة، أنت ليه بتقول كده كتير؟!!"، لقيته غيّر الموضوع، وماقلبهاش زعل زي كل مرة.
بجد بدأت أشك في نفسي؛ بعد ما كنت شايفة نفسي حلوة إلى حد ما، وشيك جداا، وذكية، وعاقلة، ولبقة، بقيت شايفاها وحشة، ومبهدلة، ونحيفة جدا، وماباعرفش اختار كلامي، وده بسبب انتقاده، وفي نفس الوقت يكلمني كتير، ويقول لي: "إوعي تسيبيني"، أنا مش فاهمة ده حب ولا لأ؟؟
آسفة جدا إني طولت، بس كان نفسي فعلا أفضفض، ويا ريت تقولوا لي تفسير يريحني.
4 التعليقات:
bosy ana shyfek kwayesa felly bt2oleh kolo bs 7awly t9yareh abl elgwaz w lw msh nfe3 msh hynf3 ykon feh gwaz w hwa by3mlek kda 3shn htet2sary gamed w hwa hyzeed feha w 7setek kman tyeba bzyada w fe no3 mn elboys msh ynf3 m3ahom kda fa 5leky kwaya fel sh5seya shwaya w msh tsma7Y le ay entkad enty msh shyfa s7 !! ya ret akon feteK xD
انتى قبل لما تسالينا اسالى حد يعرفك كويس يعرفك من زمان وقوليله يقول رايه بصراحه وايه الكويس وايه الوحش فيكى اكيد يعنى مش كل حاجه بتقوليها او بتعمليها غلط ووحشه وبعدين موضوع النت ده ولا الاسبوع الى قضتيه معاه هيظهر حاجه لازم تقعدى معاه اطول فتره ممكنه هتشوفى فيه حاجات كتير عمرك مهتشوفيها فى النت وربنا يوفقك ويوفقه بس اوعى تتسرعى
بصى اولا فعلا زى ما "ميدو" بيقول موضوع النت دة لوحدة غير كافى على الاطلاق,,لازم تتعاملى معاة وجها لوجة تشوفى بيتصرف ازاى و ردود فعلة اية و كدة على ارض الواقع.
ثانيا: انتى بتقولى ان كل الناس اصلا بتشكر فيكى
مينفعش ابدا الواحد يغير من طبيعتة و شخصيتة عشان خاطر حد. احنا مبنغيرش بس غير التصرفات اللى ممكن فعلا تكون بتضايق حد يعنى مثلا لو بتغيرى ذيادة عن اللزوم,,ايوة دة حاجة من حقة انة يقولك مثلالو سمحتى قلليها لان مثلا بتحسس اللى قدامك انك مش واثقة فية. دة مثال يعنى.
انما لما يكون اسلوب خاص بيكى فى الكلام او فى الكتابة او فى الحياة عموما.
دة مش من حق حد يقولك غيريها. و بعدين لازم تعرفى ان فترة الخطوبة معمولة اصلا عشان الطرفين يتعرفو على طباع بعض و اسلوب حياتهم و لو فى طرف مرتاحش لحاجة مثلا فى الطرف التانى خلاص مبيكملش و دة مش بيبقى معناة انة لقى عيب لكن دة معناة ان مفبش توافق فى الشخصيات,,مش اكتر.
يعنى انا ممكن يكون قدامى واحد بالنسبة لواحدة غيرى انة تحفة و مفيهوش غلطة بس بالنسبة ليا انا شايفة ان فى تصرف معين او طبع معين مش يناسبنى و دة حاجة متعيبوش ولا تعيبك.
هو بقى لازم يعرف كدة,,انتو دلوقتى فى فترة خطوبة لو لقيتى انتقداتة ما زالت بالشكل دة
اتكلمى معاة بصراحة و بعقلانية ,,عادى الفتى نظرة ان فترة الخطوبة معمولة عشان نشوف ان كنا متوافقين فى الطباع ولا لأ و اننا لازم نبقى صرحة مع بعض و ان مفيش ممشاكل يعنى لو مكانش فى ارتياح من طرف للتانى لكن ان يبقى فى طرف فيكو مكمل و خلاص على امل ان كل حاجة مش عجباة هو هيغيرها بمجرد انة يؤمرك مثلا غير واضع فى اعتبارة ان ليكى كيانك و شخصيتك و ان كدة بيقلل ثقتك بنفسك يبقى مينفعش ابدااااااا.
و نصيحة اخيرة متخليش حد يقلل ثقتك فى نفسك لان بمجرد ان ثقتتك تروح هتبقى شخصية ضعيفة و فعلا بتنفذى كل أمر متوجهلك لانك خلاص اتبرمجتى على انك حد و حش و مش عاقل و كويس اوى ان اللى قدامك مستحملك فى حين انك فى الواقع العكس تماما بدليل انك بتقولى ان كل اللى حواليكى دايما بيشكر فيكى.
خدى بالك و متتسرعيش و اتمنى ان هو كمان يفهم ان مفيش حد كامل و ممكن جدا يكون عاجبة فيكى حاجات كتير بس عايز يعملك كاملة فكل حاجة مش عجباة نفسة يغيرها فيكى و دة مينفعش ابدا ابدا ابدا.
فخدى بالك على نفسك و متخليش حد يغير شخصيتك الطبيعية اللى الناس بتشكر فيها.
يا اما يقبلك على كدة يا اما خلاص يشوف حد تانى يتوافق معاة. انا دة رايي
و ربنا يوفقك و ان شاء الله ربنا يهدى سركو و اهم حاجة ان اللى فية الخير يكون من نصيبك
بسبب موضوع الكلام على النت ده انا حصل معايا مشاكل في المرة اللي كنت خاطب فيها ... لان الطرفين مش بيشوفو بعض ولا بيشوفو ردود افعال بعض .. ممكن تقولي كلمة عادية بهزار والطرف التاني يفهمها على انها جد او اهانة ..... نصيحتي بلاش حكاية النت دي وممكن تبقى محادثات على التليفون او حتى على النت بالصوت والفيديو لو امكن .. بس لازم تعبيراتكم توصل لبعض صح :)
إرسال تعليق